dil bhar aae aur abr-e-dida mein pani na ho
ye zamin sahra dikhai de jo barani na ho

shauq itna sahal kyun us par le jae mujhe
phir palat aaun agar dariya mein tughyani na ho

kan bajte hain hawa ki sitiyon par raat-bhar
chaunk uthta hun ki aahat jaani-pahchani na ho

ho gae be-khud to tison ka maza chhin jaega
rokta hun dard ki itni farawani na ho

tere hone se mere dil mein hai yaadon ki chamak
chand bujh jae agar suraj mein tabani na ho

dhanp le mitti se tan apna agar maqdur ho
pairahan kaisa agar ehsas-e-uryani na ho

ji raha hun main ki auron se bhi hai wabastagi
maut aa jae agar koi pareshani na ho

dal de 'shahid' shafaq par raat ki kali rida
mere darwaze se zahir ghar ki virani na ho