dil chahat se khali hai
ye kaisi khush-haali hai

pahle kanha kale the
ab radha bhi kali hai

aag nahin hai chulhon mein
kahne ko diwali hai

ishq maraz ki ek dawa
hum ne aaj nikali hai

jis ne masla phulon ko
baghon ka ab mali hai

hum ne apni bhi surat
us jaisi hi bana li hai

bikne par hain aamada
qimat aur gira li hai

basti ne nadiyan kha lin
jamuna ji ab nali hai

baadal chhantne wala hai
dhup nikalne wali hai

hum ko dar hai bagulon ka
aur hawa matwali hai