dil-e-tabah bhi hai aalam-e-kharab bhi hai
nigah-e-dost yahi waqt-e-inqalab bhi hai

do-atisha sar-e-rukhsar ho gae aansu
gulon pe qatra-e-shabnam nahin sharab bhi hai

nigah-e-shauq larazte hain tar chilman ke
talash kar inhi kirnon mein aaftab bhi hai

kahan se dekhiye mauj-e-surur uthti hai
nigah-e-naz bhi hai saghar-e-sharab bhi hai

khilaf-e-ahal-e-safina hi nakhuda se nahin
jabin-e-bahr pe larzan khat-e-itab bhi hai

hawa-e-dahr ne phir damanon pe dal diya
wo gard jis mein nihan bu-e-inqalab bhi hai

ai jastgan-e-rah-e-gham chale chalo aage
koi maqam ba-nam-e-bahisht-e-khwab bhi hai

yahi wo 'mani' hai salma-e-gondwana tera
jo faiz-e-rukh se tere sahib-e-kitab bhi hai