dil hai bahr-e-be-karan dil ki umang
chaar mauj chaar su hai chaar rang

mauj-e-awwal hai juz-o-kul mein muhit
sar-ba-sar kibr-o-mina ka rang-dhang

hai tasawwur doyami mauj-e-khayal
farsh se ta-arsh jis ki hai tarang

soyami hai aql mahdud-o-salim
mante hain jis ka loha sab dabang

dil ki hai mauj-e-chahaarum wahima
dam-ba-dam jis ki anokhi hai umang

chaar dang-e-alam-e-ijad mein
chaar maujen hain baham aur khana-jang

jaan ki tahrik se hai sab numud
khwah dil hai khwah hai dil ki umang

hain isi tahrik mein aakhir fana
shama ki lau mein fana jaise patang

aql ki saiqal se ho jata hai pak
dil ke aaine ko jab lagta hai zang

ilm mein hai hasti-e-dil be-sabaat
jaise 'sahir' aab-e-dariya mein tarang