dil ikhtiyar mein hai na jaan ikhtiyar mein
saqi ne kya mila diya kaif-e-bahaar mein

the chaar din jo zindagi-e-mustaar mein
do aarzu mein kat gae do intizar mein

saqi ki ek nazar bhi agar hum pe pad gai
tauba ka khun kar ke rahenge bahaar mein

is but se kar ke zikr-e-wafa hae kya kiya
ek pech dal di dil-e-be-e'tibar mein

thi kis ki yaad aaj jo tadpa gai hamein
ek huk uth rahi hai dil-e-be-qarar mein

aaghosh-e-chashm ko sabad-e-gul bana diya
ghunche jo khilkhilae hujum-e-bahaar mein

ye bhi ada-e-naz thi wo bhi ada-e-naz
machlen jo shokhiyan nigah-e-sharm-sar mein

rote mujhe jo dekha to kuchh aur khinch gae
ulta fusun tha girya-e-be-ikhtiyar mein

hasrat ke aansuon mein tamanna ka khun hai
pani mein aag hai ki hai shabnam sharar mein

parwana said-e-nur to bulbul asir-e-rang
kis ki ada sama gai gul mein sharar mein