dil ka safar bas ek hi manzil pe bas nahin
itna khayal us ka hamein is baras nahin

dekho gul-e-ahaar-e-asar dasht-e-sham mein
diwar-o-dar koi bhi kahin pesh-o-pas nahin

aaya nahin yaqin bahut der tak hamein
apne hi ghar ka dar hai ye bab-e-qafas nahin

aisa safar hai jis ki koi intiha nahin
aisa makan hai jis mein koi ham-nafas nahin

aaegi phir bahaar isi shahr mein 'munir'
taqdir is nagar ki faqat khar-o-khas nahin