dil ke har zarre mein paida qais ki duniya karen
aao daman-e-nazar ko aaj hum laila karen

teri shokhi aur mere dil ki betabi ko dekh
kar diya raaz-e-junun ifsha bata hum kya karen

aankh mein taswir teri dil mein teri yaad hai
aur hum duniya mein rah kar tu hi kah de kya karen

phir mere dil mein chalen aaen wo be-parda kabhi
phir mere jazbaat mein wo hashr sa barpa karen

hai jo daman-e-mizha mein ek qatra ashk ka
ji mein aata hai ki is qatre ko ab dariya karen

sard pad jae na 'fazil' garmi-e-bazar-e-husn
aao chadh kar dar par phir ek hashr sa barpa karen