dil ke rahne ke liye shahr-e-khayalat nahin
sar-ba-sar hai nafi is mein kahin isbaat nahin

ranj gar wan se to rahat bhi wahin se aawe
kaun kahta hai yahan wahdat-e-ayat nahin

mujh se kahte hain hawaej se sarokar na rakh
meri tarif ba-juz qissa-e-hajat nahin

koi batlao shab-o-roz pe kya guzri hai
raat khamosh nahin din mein koi baat nahin

thi falatun ki jo jamhur se ru-gardani
hum samajhte the khurafat khurafat nahin

dil se guzre kabhi dushman ke liye fikr-e-zarar
wo watira nahin mera mere jazbaat nahin

ahd-e-be-mehr mein ek chaal mohabbat bhi chale
shah mein bazi hai meri garche abhi mat nahin

sahiba dekhna had se na badhe yurish-e-gham
na-tawan dil hai mera khema-e-sadat nahin