dil ke waraq-e-sada pe kuchh rang ubhaaren
khun-gashta tamannaon ki taswir utaren

shayad koi rauzan koi khidki nikal aae
sar apna chalo waqt ki diwar se maren

kab tak dil-e-diwana ye be-wajah taaqub
ab hath kahan aaengi ram-karda bahaaren

barham hui wo mahfil-e-yaran-e-khush-auqat
tanhai ke lamhat kahan ja ke guzaren

aangan ki udasi ko fuzun kar gain 'makhmur'
diwar pe baithi hui chidiyon ki qataren