dil ki lagi se iksir hona
ek hath chandi ek hath sona

lutf to jab hai wo khud nawaze
kaha bahti ganga mein hath dhona

phir be-rukhi hai aur aarzi hai
kufr sarasar mayus hona

baithna uthna nazm-o-adab se
ain ibaadat hai un ka hona

ishq ka maslak saf-dili hai
rasm-e-numaish daman ko dhona

anjuman-araiyon ke liye ab
farz nahin hai un ka bhi hona

'mani' ko baiat hai ek sanam se
kajlai aankhen rang salona