dil ko aazar lagana hi nahin hota hai
ab tere dhyan mein jaana hi nahin hota hai

saf-ba-saf der se palkon pe ruke hain aansu
qafila aage rawana hi nahin hota hai

mang leta hai dil-o-jaan wo hanste hanste
aur mere pas bahana hi nahin hota hai

mashwara karne ko jate the kabhi majnun se
dasht mein ab koi dana hi nahin hota hai

is qadar gard hai is aab-o-hawa mein har-su
nakhl-e-ehsas tawana hi nahin hota hai

hath aa jata hai us shakhs ke dariya 'tariq'
jis ne sahra kabhi chhana hi nahin hota hai