guzar raha tha main jab pa-shikasta taef se
jari bhi sare dikhai diye the khaif se

ye sher ranj-o-alam ka ajib nuskha hain
balaen talte hain hum inhi wazaif se

bahut qarine se malfuf hain mizha mein ashk
bahalti rahti hain aankhen tere tahaif se

hamare dard ki tafsil mein gaya hi nahin
wo aashna hua do-chaar hi kawaif se

so hum ko naghma-e-duniya bhi kya bhala lagta
ki dil laga nahin apna kuchh us tawaif se

wo ajnabi tha magar jaan hi gaya 'tariq'
mere fasana-e-gham ko mere lataif se