dil ko darun-e-khana hi bahlao ghar raho
tum ko qasam hai bhid mein mat jao ghar raho

zinda rahe to yar bahut mahfilen bahut
filhaal mere anjuman-arao! ghar raho

mana ki id milna bhi dastur hai magar
sinon se lag ke maut na phailao ghar raho

chaukhat na par karna ki bahar hai qatl-e-am
galiyon mein chal rahi hai ajal daw ghar raho

mahbub ko bhi le ke maroge tum apne sath
gar ishq hai to ishq na jatlao ghar raho

dariya-e-khun hai qariya-o-bazar mein rawan
tah kar ke rakh do yaro abhi naw ghar raho

ek mufti-e-sakhi ka hai fatwa ki thik hai
ghar rah ke chahe mai hi piye jao ghar raho

faris! hamein bhi shauq-e-mulaqat hai magar
pure karenge baad mein sab chaw ghar raho