dil mein junun-e-ishq jagane ka waqt hai
ab ain shin qaf milane ka waqt hai

ahl-e-sukhan ki shan badhane ka waqt hai
ab dip chahaton ke jalane ka waqt hai

ab is ke baad khel na khele koi yahan
maidan mein husain ke aane ka waqt hai

tabir ki sahar ne sada di hai phir unhen
bistar pe soe khwab jagane ka waqt hai

tum puchhte ho kis liye makhmur hum hue
mai-kash yahi to pyas bujhane ka waqt hai

khud ko nawa-e-soz mein mat dhaalo shairo
iqbaal ki khudi ko badhane ka waqt hai

khushbu tamam shahr mein phaile ho aashti
takhliq mein wo lafz sajaane ka waqt hai