dil ko virana kahoge mujhe malum na tha
phir bhi dil hi mein rahoge mujhe malum na tha

sath duniya ka main chhodunga tumhaari khatir
aur tum sath na doge mujhe malum na tha

chup jo hun koi buri baat hai mere dil mein
tum bhi ye baat kahoge mujhe malum na tha

log rote hain meri bad-nazari ka rona
tum bhi is rau mein bahoge mujhe malum na tha

tum to be-sabr the aaghaz-e-mohabbat mein 'hafiz'
is qadar jabr sahoge mujhe malum na tha