dil liya hai to bewafa na bano
dard mat do agar dawa na bano

ya nawazo to lutf-e-paiham se
ya kisi ka tum aasra na bano

dil mein hur-o-qusur hain har aan
shaikh upar se parsa na bano

ashraf-ul-khalq hai laqab us ka
pahle insan bano khuda na bano

muddai ka na ho jo pas tumhein
phir kisi dil ka muddaa na bano

hum wafadar hain rahenge bhi
na bano aap ba-wafa na bano

laj rakh tu 'sahar' ke sajdon ki
but bano tum agar khuda na bano