dil mein har ek aarzu ghut ghut ke mar gai
umr-e-rawan guzarne ko aakhir guzar gai

ai chand taro aap ne dekha hai kya use
meri khushi abhi abhi jaane kidhar gai

sham-e-gham-e-firaq thi aur aap ka khayal
phir yun hua ki aankh tamanna ki bhar gai

mahfil mein khul gai jo meri dafatan zaban
sunte hi kitne chehron ki rangat utar gai

bigda mera nasib to kyon gham karun bhala
ye bhi to kam nahin teri qismat sanwar gai

sada-mizajiyan hain achambhe mein aaj tak
fitna-garon ki chaal bada kaam kar gai

hosh-o-hawas ud gae aankhen khuli rahin
logon ki jab nigah tere baam par gai