dil mein har-waqt yas rahti hai
ab tabiat udas rahti hai

un se milne ki go nahin surat
un se milne ki aas rahti hai

maut se kuchh nahin khatar mujh ko
wo to har-waqt pas rahti hai

aab-e-haiwan jise bujha na sake
zindagi ko wo pyas rahti hai

dil to jalwon se bad-hawas hi tha
aankh bhi bad-hawas rahti hai

un ki surat ajab hai shoabada-baz
dur rah kar bhi pas rahti hai

dil kahan 'arsh' ab to pahlu mein
ek taswir-e-yas rahti hai