dil mein khayal-e-ishq tha mehman ki tarah
arman saja tha 'mir' ke diwan ki tarah

wusat zamin ki kho gai basti ki bhid mein
galiyon mein shor bas gaya maidan ki tarah

sar par falak ko odhe bichhae zamin wo
baitha hai shan se kisi sultan ki tarah

ghafil mere wajud se saya mera raha
tha ham-safar wo shahr mein anjaan ki tarah

rakhta hun main aziz riwayat ka silsila
girte mere makan ke dalan ki tarah

ye munfail si zindagi mujh ko nahin qubul
ahd-e-junun ke chaak-e-gareban ki tarah

tewar se us ke aag tamanna mein lag gai
jalne laga hai dil mera shamshan ki tarah

tere baghair 'sahni' taron ke darmiyan
mahfil udas thi rah-e-viran ki tarah