dil mein paiwast koi dar hai miyan
rasta waise be-khatar hai miyan

kyon sada de rahe ho suraj ko
dur hum se abhi sahar hai miyan

zindagi kya hai puchhte kyon ho
chand lamhon ka ye safar hai miyan

darmiyan hai ana ki ek diwar
fasla warna mukhtasar hai miyan

baat itni si hai ki duniya mein
aadmi khud se be-khabar hai miyan

tum haqiqat ki baat karte ho
ye to khwabon ki rahguzar hai miyan

aae ho is taraf to sath chalo
do qadam par hamara ghar hai miyan

haal kaise bayan karo 'khalid'
zindagi apni dar-ba-dar hai miyan