dil mein sharminda hain ehsas-e-khata rakhte hain
hum gunahgar hain par khauf-e-khuda rakhte hain

wo sitam-pesha kahan sharm-o-haya rakhte hain
hum gharibon pe har ek zulm rawa rakhte hain

jeb mein kuchh bhi nahin dil hai amiron jaisa
hath khali hain magar khu-e-ata rakhte hain

bewafai ka ye ilzam sarasar hai ghalat
hum to ajdad se wirse mein wafa rakhte hain

hum ne mana ki tahi-dast hain par sab ke liye
dil mein ganjina-e-ikhlas-o-wafa rakhte hain

jaane kis mod pe kya hadisa pesh aa jae
mustaqil jeb mein hum apna pata rakhte hain

sham dhalti hai to nakaamiyan karti hain nidhaal
subh hoti hai to hum azm naya rakhte hain

ji-huzuri kisi surat nahin hoti hum se
bas isi waste hum sab ko khafa rakhte hain

kyon karen fikr zamane ke chalan ki 'bebak'
hum to har haal mein jine ki ada rakhte hain