dil mein thahra dard nigoda kuza-gar
kaise mod pe tu ne chhoda kuza-gar

main bhi khud se ruthi ruthi rahti hun
jab se tu ne mukh hai moda kuza-gar

ab to bikhre bikhre hain ajza mere
joda tha to kyun-kar toda kuza-gar

meri hasti mein bhi teri hasti hai
mera mujh mein kuchh bhi na chhoda kuza-gar

main ne khud mein teri yaad sajai hai
jab bhi tu ne tanha chhoda kuza-gar

rag rag mein ab mahshar barpa rahta hai
dukh tha pahle bhi kab thoda kuza-gar

kis ne mujh se chehra mera chhina hai
kis ne mera khun nichoda kuza-gar