dil mein tujh ko shumar kar lun main
ho ijazat to pyar kar lun main

is khizan ko samet lo tum to
mausam-e-khush-gawar kar lun main

ishq agar jurm hai to jurm-e-sanam
be-sabab be-shumar kar lun main

tum ne wada kiya hai aane ka
do ghadi intizar kar lun main

sari duniya ko jit lun pal mein
tujh pe gar iftikhar kar lun main

hath hasil se phir milaunga
pahle dariya to par kar lun main

kya mulaqat phir kabhi hogi
ya use yaadgar kar lun main