dil na lagne ka ek bahana tha
kyon thaharte wo un ko jaana tha

hum ne qadmon mein rakh diya sar ko
wo the ruthe hue manana tha

meri aankhon pe hai magar ehsan
un ko parda kabhi uthana tha

ek thi jumbish-e-nazar kafi
meri bigdi ka kya banana tha

thi na ghairon se gar tujhe fursat
mujh se hargiz na dil lagana tha

kyon mere sath sath wo chalte
un ke qadmon mein khud zamana tha

dil lagana kahan tha ye 'alam'
khun-e-dil is tarah bahana tha