dil-o-nigah ki sari latafaten bhi gain
basiraton ki talab mein basarten bhi gain

gae dinon ki jahan tak amanaten bhi gain
nai ruton ki mahakti bashaaraten bhi gain

samaaton ki fasilen to phand aai sada
kabhi hisar-e-sada tak samaaten bhi gain

meri katha jo gai ta-dayar-e-shisha-o-sang
lahuluhan dilon ki hikayaten bhi gain

hara-bhara mujhe rakhti thin jo har ek rut mein
wo shakh-sar-e-badan ki hararaten bhi gain

ghazal ka sadiyon purana libas yun badla
ki fikr-o-fan ki mohazzab riwayaten bhi gain

ba-nam-e-dard mere dil ko jo mayassar thin
'atiq' ab to wo be-nam rahaten bhi gain