dil pe jo guzre hai mere aah main kis se kahun
kya karun main ai mere allah main kis se kahun

jab na tum hi haal-e-dil mera kabhi aa kar suno
to ye farmao mujhe, allah main kis se kahun

mere sahib ke zara se rabt par bigden na ghair
ghair se tum se jo kuchh hai rah main kis se kahun

dosto ab kahne sunne se nahin kuchh faeda
wo to mere gham se hai aagah main kis se kahun

yun hi nahaq sar phiraate hain mera aa aa ke log
haal apna ai but-e-gumrah main kis se kahun

be-qarari ka sabab apni kahun kis se 'nizam'
dil pe jo hai sadma-e-jaan-kah main kis se kahun