dil se ek dusre ke pyare hain
un ke hum aur wo hamare hain

apna daman jo wo pasare hain
mere aansu bhi chand tare hain

be-khudi bhi hai hoshiyari bhi
chashm-e-saqi ke kya ishaare hain

ghair ko dekh kar hamein dekha
tir par tir tum ne mare hain

husn parde mein bhi nahin chhupta
un ke chilman se bhi ishaare hain

wo hasin un ke ham-jalis hasin
chand wo dusre sitare hain

bas yahi hasil-e-mohabbat hai
tum ye kah do ki hum tumhaare hain

un ki aankhen hain dhundhti 'nashtar'
jin ke aankhon hi mein nazare hain