dil se ek yaad bhula di gai hai
kisi ghaflat ki saza di gai hai

main ne manzil ki dua mangi thi
meri raftar badha di gai hai

aib diwar ke honge zahir
meri taswir hata di gai hai

main ne ek dil pe hukumat kya ki
mujhe talwar thama di gai hai

ab mohabbat ka sabab hai wahshat
warna hasrat to mita di gai hai

ab yahan se nahin ja sakta koi
ab yahan shama jala di gai hai

is liye jam ke yahan baitha hun
mujh ko meri hi jagah di gai hai