dil se hai dil ki be-kali goya
muddaa khud hai muddai goya

aarzuen jo mit gain dil ki
bhari duniya ujad gai goya

hae ye tur-e-dil ye teri nazar
ek bijli si gir padi goya

bin tere chaar su hai virani
maut hai zindagi meri goya

ab wo khud mahw-e-chaarasazi hain
wajh-e-nazish hai bekasi goya

kya bahaar aai sehn-e-gulshan mein
aag si dil mein lag gai goya

wo nigahen badal gain jab se
sari duniya badal gai goya

ishrat-e-aish khwab-gah-e-adam
maut hai ek nind si goya

aai tifli shabab par ai 'mauj'
ab samundar hui nadi goya