dil-sokhta ko apne jalaya ghazab kiya
nairang tum ne kya ye dikhaya ghazab kiya

zinda kiya hai hasrat-e-murda ko bewafa
tu baad-e-marg gor pe aaya ghazab kiya

ye dard-e-dard-mand tamasha dikhaega
aafat-rasida ko jo sataya ghazab kiya

hum khanuman-kharab bhatakte kahan phiren
baithe bithae us ne uthaya ghazab kiya

sab kah rahe the bulbul-e-kashmir ke harif
us gul ne apna yar banaya ghazab kiya

majzub-o-mast pir-e-mughan kyun na wo rahe
'saqi' ko jam-e-jazb pilaya ghazab kiya