dilon mein midhat-e-rahman hum bhi rakhte hain
waqar-e-azmat-e-quran hum bhi rakhte hain

shuur-o-fikr to har aan hum bhi rakhte hain
bure-bhale ki to pahchan hum bhi rakhte hain

kaho na murda hamein jaan hum bhi rakhte hain
ragon mein khun ka dauran hum bhi rakhte hain

hamein banaya gaya hai sadaqaton ka amin
dilon mein jazba-e-iman hum bhi rakhte hain

tum apne zulm ko roko na hum se takrao
wagarna quwwat-e-sultan hum bhi rakhte hain

kisi bhi zarb se hargiz khata nahin honge
saron mein apne wo ausan hum bhi rakhte hain

kisi ke sath kam-o-besh ka amal na karo
nazar ke samne mizan hum bhi rakhte hain

bas ek tum hi nahin 'yas' haq-paraston mein
khuda ki zat pe iman hum bhi rakhte hain