din chhupa aur gham ke sae dhale
aarzu ke nae charagh jale

hum badalte hain rukh hawaon ka
aae duniya hamare sath chale

lab pe hichki bhi hai tabassum bhi
jaane hum kis se mil rahe hain gale

dil ke in hauslon ka haal na puchh
jo tere daman-e-karam mein pale

kaun yaad aa gaya azan ke waqt
bujhta jata hai dil charagh jale

maslahat sar-nigun khirad khamosh
ishq ke aage kis ki dal gale