diwane ki baaten sun kar chaunk pade farzane log
muddat mein pahchane lekin phir bhi kya pahchane log

roz-o-shab talkhaba-e-hasti sham-o-sahar khunaba-e-gham
amrit kah kar pi lete hain zahr-bhare paimane log

dil ka ye viran khandar phir shahr-e-tarab ban jaega
kitne sundar sapne dekha karte hain diwane log

ab wo aankh kahan hai jis par hoti thi takhliq ghazal
khwab huin wo baaten jin par likhte the afsane log

wo bachpan ke sangi-sathi wo bhi fasurda hum bhi udas
yun milte hain rasta chalte jaise hon begane log

ek nazar mahaul pe dalen 'mahir' hum phir ghaur karen
muddat se sanjida kyon hain aakhir ye diwane log