dua kisi ki kare ya na mustajab kare
magar tu chahe to zarre ko aaftab kare

gunah bhi jo kare rashk-e-sad-sawab kare
jo narawa ho use bhi rawa shabab kare

meri nazar ki jise chahe be-naqab kare
khuda wo din to dikhae jo tu hijab kare

mera ye kaam ki meri talab musalsal sidq
tera ye kaam ki jab chahe kaamyab kare

na khauf-e-pursish-e-mahshar na fikr-e-roz-e-hisab
bashar gunah par aae to be-hisab kare

khirad se ban na padi kuchh to kah diya dil se
khuda tujhe tere maqsad mein kaamyab kare

'sahar' ko tauba se inkar to nahin lekin
nigah-e-mast agar mail-e-sharab kare