dub kar is ka bhanwar kholenge
bahr-e-hasti ke guhar kholenge

pa-ba-jaulan nahin hoti himmat
aabju apni dagar kholenge

lakh diwaren uthin zindan mein
hum daricha to magar kholenge

raushni chaar taraf phailegi
aaj wo aankh jidhar kholenge

sab sitare khade hain saf bandhe
aaj lagta hai wo dar kholenge

un farishton ko milenge ashaar
jab wo saman-e-safar kholenge

aaj wo tir liye baithe hain
hum bhi hargiz na sipar kholenge

sher 'talib' ke sunenge jab bhi
uqda-e-arz-e-hunar kholenge