dukh aur tarah ke hain dua aur tarah ki
aur daman-e-qatil ki hawa aur tarah ki

diwar pe likkhi hui tahrir hai kuchh aur
deti hai khabar khalq-e-khuda aur tarah ki

kis dam uthaenge kharidar ki is bar
bazar mein hai jins-e-wafa aur tarah ki

bas aur koi din ki zara waqt thahar jae
sahraon se aaegi sada aur tarah ki

hum ku-e-malamat se nikal aae to hum ko
ras aai na phir aab-o-hawa aur tarah ki