dukh bhi sahe alam bhi sahe ranj bhi sahe
phir bhi bashar khuda ko khuda manta rahe

sab munhasir bashar pe hai wo kis tarah rahe
dukh zindagi ke hum ne to hans-khel kar sahe

dar aa gai hai zehn-e-bashar mein ye soch kya
dariya sukhon ka us ke hi ghar ki taraf bahe

aangan ka us ke ped phalon se lada bhi ho
saya bhi us ka ghar hi ki diwar tak rahe

jheli ho jis ne zindagi le le ke tera nam
tujh ko agar khuda na kahe wo to kya kahe

'rahat' milenge aur bhi kuchh qadr-dan-e-zist
dekha to kije khud se bhi hat kar gahe gahe