duniya-e-hast-o-bud se aage ki baat kar
ai ruh ab wajud se aage ki baat kar

mujh ko kitab-e-kun ka har ek bab hifz hai
tu aa'd aur samud se aage ki baat kar

mujh ko faraaz-e-ishq bata waiz-e-aziz
ab zohd se sujud se aage ki baat kar

is daur mein shahid ke waris ko mal de
phir shahid-o-shuhud se aage ki baat kar

lab khol ilm-o-fan ke khazane luta faqir
is multaji numud se aage ki baat kar

'ehram' zindagi ka bharosa nahin koi
kuchh to ziyan-o-sud se aage ki baat kar