duniya sabhi baatil ki talabgar lage hai
jis ruh ko dekho wahi bimar lage hai

jab bhuk se mar jata hai dorahe pe koi
basti ka har ek shakhs gunahgar lage hai

shayad nai tahzib ki mearaj yahi hai
haq-go hi zamane mein khata-kar lage hai

wo teri wafa ki ho ki duniya ki jafa ki
mat chhed koi baat ki talwar lage hai

kya zarf hai har zulm pe khamosh hai duniya
is daur ka insan pur-asrar lage hai

jis ne kabhi dariya ka talatum nahin dekha
sahil bhi use dur se manjhdar lage hai