dur jo bah raha tha dariya sa
pas aa kar laga wo sahra sa

hausle ki hai baat aandhi mein
jal raha hai charagh nanha sa

us ki tabir talkh hai kitni
khwab dekha jo hum ne mitha sa

ajnabiyyat ki dhund se niklun
koi aae nazar jo apna sa

tha chamakna magar meri qismat
gir gaya tut kar sitara sa

jal rahe hain charagh yaadon ke
ye jo kamre mein hai ujala sa

tum ki thahre hue kinare se
main ki bahta hua hun dariya sa

phul sa lag raha tha jo kal tak
chubh raha hai wo aaj kanta sa

muskuraate hain zakhm-e-dil 'ashhar'
hai nazar mein koi masiha sa