dushman-e-jaan bana guman apna
khatm kar dega ye jahan apna

sare dawe hue ghalat sabit
jal gaya pal mein hi makan apna

hum ne bhi us ko aazmaya tha
wo bhi to lega imtihan apna

laeq-e-eatibar hi kab tha
wo badal dega phir bayan apna

hum nikal kar safar pe dekhenge
din guzarta hai phir kahan apna

raaz jalne ka kar diya afshan
dil se uthta hua dhuan apna

gharq kashti na ho kahin ja kar
chhuta jata hai baadban apna