ehtiram-e-lab-o-rukhsar tak aa pahunche hain
bul-hawas bhi mere mear tak aa pahunche hain

jo haqaeq the wo ashkon se ham-aghosh hue
jo fasane the wo sarkar tak aa pahunche hain

kya wo nazron ko jharoke mein muallaq kar den
jo tere saya-e-diwar tak aa pahunche hain

apni taqdir ko rote rahen sahil wale
jin ko aana tha wo manjdhaar tak aa pahunche hain

ab to khul jaega shayad teri ulfat ka bharam
ahl-e-dil jurat-e-izhaar tak aa pahunche hain

ek tum ho ki khuda ban ke chhupe baithe ho
ek hum hain ki lab-e-dar tak aa pahunche hain