ek ajnabi ko dil ne yagana bana liya
bhuli hui thi baat fasana bana liya

kya intiha-e-shauq thi didar ke liye
har rahguzar ko apna thikana bana liya

qaul-o-qarar-o-rasm-e-wafa kuchh na kar sake
har bar us ne koi bahana bana liya

ai shama tere husn-e-tajalli ka hai kamal
mushtaq-e-did ko bhi diwana bana liya

yak-bargi jo samna un se kahin hua
tha husn-e-ittifaq bahana bana liya

dastur is jahan ka nirala hai dosto
dekha gharib ko to nishana bana liya

'sadiq' bhi dastan-e-wafa kya bayan karen
karke baham ishaare fasana bana liya