us sitamgar ne ye turfa sitam ijad kiya
ek ko shad kya ek ko nashad kiya

tum se shikwa hai na ghairon se gila hai koi
wahshat-e-dil ne mujhe ishq mein barbaad kiya

zindagi mein to kisi se na mili dad-e-wafa
ba'd mere mujhe duniya ne bahut yaad kiya

bas isi baat pe ab tak wo khafa hain mujh se
itna puchha tha ki kis ne sitam ijad kiya

jaan par khel ke duniya ko sanwara hai 'riyaz'
hum ne virana-e-alam yunhi aabaad kiya