ek baat bahut khas thi chehron ke safar mein
tute hue aaine mile rahguzar mein

rahta hun ujalon ke andheron ke safar mein
ye kis ne mujhe bant diya sham-o-sahar mein

diwangi-e-shauq ki azmat hai nazar mein
sahraon ki taswir laga rakkhi hai ghar mein

jab tak ki na aa jaun main sahil ki nazar mein
rahne de mujhe gardish-e-taqdir bhanwar mein

aa jae agar baal to mit jate hain jauhar
main rakhta nahin tuta hua aaina ghar mein

badh jaegi ai ham-safaro duri-e-manzil
guzri hui baaton ko na doharao safar mein

ho pyar to aasani se aa sakta hai 'saulat'
jannat ka maza chhote se tute hue ghar mein