ek bagh to lagao zara shahr-e-zehn mein
kuchh phul phal ugao zara shahr-e-zehn mein

afkar phir ghurub hue samt-e-jahl mein
raushan karo alaw zara shahr-e-zehn mein

bhatkoge kab talak bhala sahra-e-najd mein
ek roz idhar to aao zara shahr-e-zehn mein

hum bhi umid-war hain ai shahryar-e-dil
hum ko bhi to bulao zara shahr-e-zehn mein

lagta hai jaise bab-e-karamat hi band hai
phir chashm-e-naz uthao zara shahr-e-zehn mein

ai ahl-e-khanqah jagao dimagh ko
saut-e-azan uthao zara shahr-e-zehn mein

aao tumhein tamasha dikhaen shuur ka
aa jao rahnumao zara shahr-e-zehn mein

kab tak buton ke pairon mein khud ko giraoge
ab to unhen girao zara shahr-e-zehn mein

zunnar-band dair-nashin sajda-rez hun
yun apni chhab dikhao zara shahr-e-zehn mein