ek be-hunar hun aur hunar chahti hun main
ab dhup ke safar mein shajar chahti hun main

tanhaiyon ka khauf hai ghere hue mujhe
apni gali se us ka guzar chahti hun main

likkha hai apne nam se apne pate pe khat
muddat ke baad apni khabar chahti hun main

ye thik hai ki tum se mohabbat nahin mujhe
ye bhi hai thik tum ko magar chahti hun main

hai kya ajab ki tark-e-talluq ke bawajud
chehre pe apne us ki nazar chahti hun main