ek ek se yahi kahta hun bata main kya hun
ek muddat hui main bhul gaya main kya hun

naqsh-bar-ab sahi aap bana aap mita
ab talak hilti hai zanjir-e-sada main kya hun

apni pahnai mein gum-karda nishan hun main bhi
tu agar hai isi duniya ka khuda main kya hun

ek tarikh-e-wiladat hai meri ek wafat
in haqaeq ke siwa aur bata main kya hun

ab kahan dhundhne jaoge mujhe ai logo
ho chuka khak gai le ke hawa main kya hun