ek fasl-e-dard aath pahar chun raha hun main
jo kat rahe hain rah mein sar chun raha hun main

parwaz ke baghair to jina muhaal hai
sayyaad ne jo kate hain par chun raha hun main

sathi the kaise kaise mere jo bichhad gae
palkon se un ki gard-e-safar chun raha hun main

taid ke liye mujhe anjum ki hai talash
ek anjuman ke shams-o-qamar chun raha hun main

kat bhi chuka wo kab ka jo tha muddai-e-fan
ab purza-ha-e-dast-e-hunar chun raha hun main

kya dil-kharash kaam hua hai mere sipurd
ek zard-rut ke barg-o-samar chun raha hun mein