ek ghadi jazba-e-nafrat ke siwa chahti hai
zindagi tujh se mohabbat ki dua chahti hai

kya karun dost to itne bhi nahin hain mere
roz ye ruh koi zakhm naya chahti hai

kya ajab taur se karti hai shikast apni qubul
ab ye duniya koi hangama bapa chahti hai

jis mohabbat ke labon se kabhi jhadte the gulab
ab wahi lahja-e-ashufta-nawa chahti hai

jaan ko zakhm-e-tamanna se ifaqa na hua
phir nae ishq mein paiman-e-wafa chahti hai

shohraten dhal gain ek umr ki manind so ab
mauj-e-ruswai mere ghar ka pata chahti hai

mere honton ki tamanna bhi ajab hai 'afaq'
us ke rukhsar pe ek phul khila chahti hai